काठमाडौं, १४ चैत । काठमाडौं महानगरपालिकाको अनुगमन समितिले वडा नम्बर–१५ को किमडोलमा निर्माण हुँदै गरेको धर्मकिर्त विहारको स्वामित्वमा भएको बुद्धिष्ट एजुकेशन भवनको काम तत्काललाई रोक्न निर्देशन दिएको छ ।
अनुगमन समितिका संयोजक समेत रहनु भएकी उपप्रमुख सुनिता डंगोलले स्थलगत निरीक्षणका क्रममा यस्तो निर्देशन दिनुभएको हो । विज्ञ टोली लिएर त्यहाँ पुग्नु भएकी डंगोलले सम्झौता अनुसार काम नभएको भन्दै निरीक्षणछि भवन निर्माणको काम रोक्न निर्देशन दिनुभएको छ ।
२०८२ साल भदौ २२ सम्ममा सम्पन्न गर्ने गरी सम्झौता भएको सो भवन ५६ लाख ५८ हजार ३ सय ७२ रुपैँया भ्याट बाहेक निर्माण निर्माण सम्झौता भएको हो । डंगोलले सम्झौता अनुसार काम नभएपछि तत्कालका लागि निर्माणको काम रोक्न निर्देशन दिएको जानकारी दिनुभयो । ‘भवन निर्माणका क्रममा भर्याङ नमिलेकाले भत्काउनु पर्ने अवस्था देखियो । त्यसैगरी फर्मामुनि इट्टा राख्नेलगायतका काममा पनि लापरवाही भएको पाइयो,’ उपप्रमुख डंगोलले भन्नुभयो, ‘अनुगमन गर्दा काम सन्तोषजनक नदेखिएपछि अर्को पटक काम सुरु गर्नुभन्दा अगाडि पुनः अनुगमन गर्ने र त्यसपछि मात्रै भवन निर्माणको काम थाल्ने भनेर निर्देशन दिएका छौँ ।’ उहाँले सम्झौता अनुसार सबै कामहरु सुधार नगरेसम्म रकम निकासा नगर्ने पनि जानकारी दिनुभयो । ढलान गरेको ठाउँमा पानी हाल्ने लगायतका काममा समेत लापरबाही भएको पाइएको उहाँले जानकारी दिनुभयो ।
सुपरभिजन गर्ने आर्किटेक इन्जिनियर र सिभिल इन्जिनियरले पटक–पटक मौखिक निर्देशन तथा सुझाव दिदा समेत सो बमोजिमको कार्य नगरेको भनिएकोले अव उप्राप्त फोकल पर्सन, आर्किटेक इन्जिनियर र सिभिल इन्जिनियर मार्फत् सम्बन्धित विभागबाट लिखित स्वीकृति नगरी कुनै काम अगाडि नबढाउन पनि निर्देशन दिएको छ । डंगोलले पछिल्लो समय महानगरपालिकाले सडक, सडक किनारा, ढल निकास, भवनजस्ता भौतिक पूर्वाधारको गुणस्तरीयता र दिगोपनाका लागि पूर्वाधार अनुगमनलाई नियमित गर्दै आएको भन्दै यो अनुगमन पनि नियमित भएको जानकारी दिनुभयो ।
‘हामी अनुगमनमा पूर्व जानकारी विना नै जाने गरेका छौँ । आज पनि हामी पूर्वजानकारी विना नै त्यहाँ पुगेका थियौँ । प्राविधिक टीमसहित त्यहाँ पुगेर अनुगमन गर्दा कमजोरी पाएपछि रोक लगाएका हौँ,’ उहाँले भन्नुभयो । उहाँले अनुगमनको काम परियोजनाहरु सम्पन्न भएपछि मात्रै होइन परियोजनाहरु सुरु हुँदै गर्दा पनि गर्नुपर्छ र त्यसले गुणस्तरीय संरचना निर्माणमा सहयोग पुग्छ भनेर निर्माण पूर्व पनि अनुगमन नियमित गर्दै आएको जानकारी पनि दिनुभयो ।
सहरी योजना आयोगका उपाध्यक्ष डा. सुमननरसिंह राजभण्डारीले पनि सम्झौता अनुसार काम नभएकाले निर्माणमा रोक लगाएको बताउनुभयो । भवन निर्माणको काम श्री आदि इन्जिनियरिङ सर्भिसेज (प्रा.) लिले गरिरहेको छ ।
सगरमाथा संवाद
१५ बैशाख २०८२, सोमबार