काठमाडौं,२ वैशाख । काठमाडौं महानगरपालिकाकी उपप्रमुख सुनिता डंगोल वल्र्ड इकोनोमिक फोरमको योङ ग्लोबल लिडर–२०२५ मा छनोट हुनुभएको छ । वर्ल्ड इकोनोमिक फोरम सुन्दर भविष्य भएका असाधारण व्यक्तिहरूको अन्तर्राष्ट्रिय सञ्जाल हो । यसमा छनोट हुन् हजारौंले आवेदन दिए पनि सिमित व्यक्ति मात्रै छनोट हुन्छन् । विश्वभरीबाट संस्कृति, सम्पदा, खेल, व्यापार, समाजसेवी, राजनीतिज्ञलगायतका विभिन्न विधामा ४० वर्ष मुनिका ११६ जना छनोटमा परेका हुन् । यस वर्ष दक्षिण एसियाबाट ११ जना छनोट हुँदा नेपालबाट डंगोल मात्रै छनोट हुनुभएको हो ।
राजनीति क्षेत्रबाट १९ जना छनोट हुँदा डंगोल पनि छनोट हुनुभएको हो । डंगोलसँगै थाइल्याण्डकी प्रधानमन्त्री पाइतोङतार्न सिनावात्रा र भारतका नागरिक उड्डयन मन्त्री किंजरापु राममोहन नायडू पनि राजनीति क्षेत्रबाटै छनोट हुनुभएको हो । डंगोलले योङ ग्लोबल लिडरमा आफू छनोट भएपछि खुशी लागेको बताउनुभयो । ‘यसरी छनोट हुँदा गर्व लागेको छ,’ उहाँले भन्नुभयो, ‘संसार भरको यो मञ्चमा समग्र नेपालको पनि प्रतिनिधित्व गर्दै युवा नेतृत्वका रुपमा छनोट हुँदा थप खुशी लागेको छ ।’ उहाँले परिवर्तनका संवाहक युवा हुन भन्दै आफू स्वयं पनि युवामा विश्वास राख्ने भएकाले संसारभर नै सकारात्मक सन्देश दिने यो मञ्चमा आफू छनोट हुँदा त्यो समग्र युवाको प्रतिनिधित्व भएको आफूले महशुस गरेको बताउनुभयो ।
‘यो छनोटले मलाई थप जिम्मेवारीवोध भएको महशुस गरेको छु,’ उहाँले भन्नुभयो, ‘आफु जुन भूमिकामा छु त्यहाँ रहेर अझ धेरै राम्रो गर्नका लागि प्रोत्साहन पनि मिलेको छ ।’
‘मिस नेवा २०११’ की विजेता डंगोल लिपी क्वीनको समेत परिचय बनाउनु भएको व्यक्ति हुनुहुन्छ । उहाँसहितको टीमले स्थानीय लिपीको संरक्षणका लागि नागरिकको घर, चोक, टोल र सडक हुँदै सार्वजनिक ठाउँमा ‘वर्कसप’ चलाएर उपत्यका हुँदै जिल्ला र विदेशसम्म ‘क्यालिजात्रा’को पहुँच पुर्याएको थियो । उहाँलाई स्थानीय लिपीहरूको संरक्षणसँगै राजधानीको उपप्रमुख समेतको स्थानमा पुग्न सफल भएको भन्दै यस्मा छनोट गरेको हो । उहाँलाई सांस्कृतिक सम्पदा प्रवर्द्धन, युवाशक्ति सशक्तिकरण र शहरी नवप्रवर्तनमा समर्पित, एक ऊर्जावान नेतृ भएको तथा समावेशी शासनप्रणालीको पक्षधर भएर काठमाडौंका विविध समुदायहरूको आवाजलाई प्रतिनिधित्व गर्न निरन्तर दत्तचित्त भएकाले छनोट गरेको उल्लेख छ ।
सगरमाथा संवाद
१४ बैशाख २०८२, आइतबार